Selur Tinder til Finnmerkur

Bátasmiðjan Trefjar hefur afhent nýjan Cleopatra-bát til Kjøllefjord í Finnmörku í Noregi. Er báturinn af gerðinni Cleopatra-36 og er ellefu metra langur og mælist fjórtán brúttótonn.

Kaupandi bátsins er Daniel Lauritzen sem jafnframt verður skipstjóri, en báturinn hefur hlotið nafnið Tinder og er útbúinn til línuveiða. Þegar eru hafnar veiðar á bátnum.

Aðalvél bátsins er af gerðinni Scania D9, 410 hestöfl og tengd ZF V-gír.  Rafstöðin er af gerðinni Nanni og andveltisnúður af gerðinni Quick er staðsettur í vélarrúmi.

Báturinn er í tilkynningu frá Trefjum sagður útbúinn fullkomnum siglingatækjum af gerðinni JRC. Báturinn einnig útbúinn vökvadrifinni hliðarskrúfu sem tengd er sjálfstýringu bátsins.  
Línuspil kemur frá Beiti en annar veiðibúnaður kemur frá Noregi, og loks kemur öryggisbúnaður bátsins frá Viking-björgunarbúnaði.

Rými er fyrir fimmtán 380 lítra kör í lest og er stór borðsalur er í brúnni. Fullkomin eldunaraðstaða er í lúkar og þar er einnig svefnpláss fyrir þrjá.

• Blogga um frétt