Selja íslenskt hugvit fyrir 13,5 milljarða

Fulltrúar 13 íslenskra fyrirtækja mættu á alþjóðlegu sjávarútvegsráðstefnuna „Fishing in the Arctic“ í Murmansk í Rússlandi í síðasta mánuði. „Það er mjög mikið að gerast í þessu og það voru fjögur félög frá okkur í Knarr Maritime hópnum sem tóku þátt í þessari ráðstefnu,“ segir Jónas Tryggvason, framkvæmdastjóri Knarr í Rússlandi. 

Umfang verkefna Knarr í Rússlandi er sífellt að aukast, að sögn framkvæmdastjórans. „Á þessu rúmu ári sem við höfum verið virkir í Rússlandi er búið að skrifa, bara hjá okkar hópi, undir samninga sem eru yfir hundrað milljónir evra (andvirði um 13,5 milljarðar íslenskra króna). Þetta eru verkefni næstu þrjú árin, sumt af þessu er næstum því búið en annað er eitthvað sem tekur lengri tíma eins og skipasmíði og uppsetning búnaðar.“

Ný starfsstöð

Mikil uppbygging er nú innan sjávarútvegs í Rússlandi að sögn Jónasar sem vísar til þess að stjórnvöld þarlendis hafa skapað hvata til þess að endurnýja fiskiflotann sem er orðinn úreltur. 

„Þetta er að miklu leyti hugvit og þetta eru kerfi, eins og fiskvinnslukerfi, vinnsludekk á togurum, fiskvinnsluhús og hönnun á skipum. Við erum líka að selja lausnir í sambandi við trollbúnað og allt sem tengist því. Þetta er allt saman tækni sem er þróuð á Íslandi sem við erum að selja og það er mikill áhugi hjá Rússunum,“ útskýrir Jónas.

Lesa má greinina í heild í Morgunblaðinu í dag.