„Vonandi gengur þetta svona áfram“

„Það hefur verið mjög góð veiði frá því undir lok síðustu viku. Kolmunninn hefur þétt sig og þá batnar aflinn. Skipin eru gjarnan að fá 400-500 tonn eftir að hafa togað í fimm tíma og aflinn hefur reyndar farið upp í 700 tonn. Áður þurfti að toga í eina fimmtán tíma til að fá 400 tonna afla,“ segir Tómas Kárason, skipstjóri á Beiti NK.

Góður gangur hefur verið í kolmunnaveiðunum í færeysku lögsögunni síðustu daga og hafa skipin fengið góðan afla eftir að hafa togað í stuttan tíma, að því er fram kemur á vef Síldarvinnslunnar.

Segir þar að skipin hafi komið til löndunar í Neskaupstað og á Seyðisfirði hvert af öðru með fullfermi og fiskimjölsverksmiðjurnar hafi haft nóg að gera. Börkur NK landaði í Neskaupstað aðfaranótt laugardags og Bjarni Ólafsson AK kom í kjölfar hans. Beitir NK kom síðan til Seyðisfjarðar á sunnudag og Hákon EA kom til Neskaupstaðar í gærmorgun. 

Beitir NK var á leið á miðin í gær þegar slegið var á þráðinn í brúna til Tómasar.

„Það hefur verið góð veiði hjá öllum skipum þarna, en skipin eru færeysk og rússnesk auk íslensku skipanna. Menn eru bara bjartsýnir hvað varðar framhald veiðanna. Vonandi gengur þetta svona áfram.“

• Blogga um frétt