„Hinn besti reytingur“

„Það var jafn og góður afli allan túrinn, hinn besti reytingur. Við vorum einungis að veiðum í rétt rúmlega þrjá sólarhringa þannig að aflinn fór yfir 30 tonn á sólarhring. Við vorum í ýsu og þorski á Lónsbugtinni og síðan héldum við í Berufjarðarálinn og enduðum túrinn í Hvalbakshallinu.“

Þetta segir Þórhallur Jónsson, skipstjóri á Gullveri NS, sem kom til Seyðisfjarðar á laugardagskvöld með 106 tonn af afla; 37 tonn af þorski, 34 tonn af ufsa, 24 tonn af gullkarfa og um níu tonn af ýsu.

Þórhallur Jónsson skipstjóri í brúnni. mbl.is/Þorgeir Baldursson

Landað var úr skipinu á sunnudag og haldið aftur til veiða síðdegis þann dag. Hluti afla Gullvers fer til vinnslu í fiskvinnslustöðinni á Seyðisfirði og segir Ómar Bogason framleiðslustjóri að þar sé unninn þorskur, ýsa og ufsi.

„Vinnslan er hefðbundin hjá okkur og við framleiðum bæði ferskt og frosið fyrir Evrópumarkað. Nú eru einhver teikn á lofti um hækkandi ufsaverð á mörkuðum og það kemur sér afar vel,“ er haft eftir Ómari á vef Síldarvinnslunnar.

• Blogga um frétt