Kristján Þór Júlíusson, sjávarútvegs- og landbúnaðarráðherra, átti í dag fund með helstu hagsmunaaðilum í uppbyggingu fiskeldis. Tilefni fundarins var samþykkt Alþingis í síðustu viku á tveimur frumvörpum um fiskeldi, annars vegar um gjaldtöku og hins vegar um breytingar á ýmsum lögum um fiskeldi.

Þetta kemur fram í tilkynningu frá Stjórnarráðinu. Segir í henni að á fundinum hafi Kristján Þór farið yfir næstu skref í þeim verkefnum sem samþykkt frumvarpanna leiði af sér og jafnframt kallað eftir sjónarmiðum fundargesta.

Aðilar skipt sér í fylkingar

„Undanfarna mánuði og misseri hefur umræðan um uppbyggingu fiskeldis verið nokkuð harkaleg og þar hafa þessir helstu aðilar skipt sér í fylkingar,“ er haft eftir ráðherranum í tilkynningunni.

„Ég vildi með þessum fundi kalla fulltrúa þessara aðila saman og fara yfir næstu skref. Jafnframt hvetja þá til að leita leiða til að leggja sín lóð á vogarskálarnar þannig að meiri sátt geti skapast um uppbyggingu atvinnugreinarinnar. Ég er sannfærður um að samþykkt Alþingis á þessum tveimur frumvörpum geti orðið góður grunnur í því verkefni.“

Fundinn sátu fulltrúar frá Icelandic Wildlife Fund, Landssambandi veiðifélaga, Samtökum fyrirtækja í sjávarútvegi, Sambandi íslenskra sveitarfélaga auk fulltrúa frá sveitarfélögum á Vestfjörðum og Austurlandi.

Tengdar fréttir

Fiskeldi

„Margt hefur nú ekki beinlínis verið til fyrirmyndar“

• Segir nýtt frumvarp gefa eldisfyrirtækjum auðlindir
• Laxey fær sex milljarða
• Fjárfestingin 115 milljarðar króna
• Bátur Arnarlax verður fyrsti sinnar tegundar

» Fleiri tengdar fréttir

• Blogga um frétt