„Veiðibann hefur engin áhrif“

„Þetta bann hefur akkúrat engin áhrif á selastofn vegna þess að það hefur ekki verið veiddur landselur í net sem neinu nemur í tugi ára,“ segir Kristinn Nikulásson, stjórnarmaður í Samtökum selabænda, í samtali við mbl.is um tillögu Hafrannsóknarstofnunar um bann við beinum veiðum á landsel.

Kristinn segir sel hafi farið að fækka fyrir talsvert löngu síðan, um það leyti sem grásleppuveiðar fóru að aukast verulega. „Þar sem ég þekki best til – en ég hef búið á Breiðafjarðareyjum – þar hafa selveiðar verið stundaðar alla tíð. Síðan fóru grásleppuveiðar að vera af einhverju marki upp úr 1970. Eftir það hefur sel fækkað.“

Frétt af mbl.is

Leggja til bann við landselsveiðum

„Það er þannig að urtan bítur frá sér kópinn þegar hann er orðinn ákveðið gamall. Þá fer hann út um allt og drepur sig í grásleppunetum. Ég stundaði sjálfur grásleppuveiðar lengi og fékk talsvert mikið af kópum í netin,“ segir Kristinn, sem þó kveðst ekki vera að mæla fyrir því að leggja af grásleppuveiðar.

Landselastofninn hefur minnkað ört.

„Nánast ekkert verið veitt af sel“

„Í Breiðafirði var alveg gríðarlegur fjöldi neta og þetta var það sem fækkaði sel fyrst og fremst – grásleppuveiðar,“ staðhæfir hann og bætir því við að bann við selveiðum sé ekki til nokkurra hluta og telur hugmyndina mjög skrítna.

Bann mun ekki hafa áhrif á starfsemi selabænda, að sögn Kristins. „Það hefur nánast ekkert verið veitt af sel mjög lengi vegna fækkunar og markaðsmála. Það hefur ekki verið markaður fyrir skinnin. Þetta rústaðist fyrir mörgum árum síðan.“

„Veiðarnar eru mjög litlar, þannig að áhrifin [af banni] verða engin. Ég veit ekki hver er að slá sig til riddara með þessu banni, því það er einskis virði.“

• Blogga um frétt