Nýja Vestmannaey stóðst prófanir

Hin nýja Vestmannaey VE, sem er í smíðum hjá skipasmíðastöð í Vard í Aukra í Noregi, fór í prufusiglingu 27. júní síðastliðinn. Um tveimur vikum síðar fóru fram veiðarfæraprófanir þar sem allur búnaður sem tengist veiðarfærum um borð í skipinu var prófaður.

Prufusiglingin og veiðarfæraprófanirnar gengu vel í alla staði og mikil ánægja ríkir með skipið, segir Guðmundur Alfreðsson útgerðarstjóri Bergs-Hugins.

Systurskip Vestmannaeyjar, Bergey, er sömuleiðis í smíðum hjá Vard í Aukra og ráðgert er að það verði sjósett í næsta mánuði. Skipin eru tæplega 29 metrar að lengd og 12 metra breið og há.

Gert er ráð fyrir því að Vestmannaey verði afhent Bergi-Hugin, dótturfélagi Síldarvinnslunnar, síðar í þessari viku, segir í tilkynningu frá Síldarvinnslunni.

• Blogga um frétt