Fyrstir til að keppa við opinbera aðila

Fyrirtækið Icetugs verður fyrst allra til að fara í samkeppni við opinbera aðila um hafnaraðstoð. Fyrirtækið, sem er í eigu bræðranna Braga Más og Ægis Arnar Valgeirssona, hefur verið í miklum vexti síðustu ár. Á næsta leiti er frekari útvíkkun starfseminnar en til að styðja við það hafa þrír nýir dráttarbátar verið fengnir til landsins.

Með komu bátanna margfaldast rekstur fyrirtækisins og hleypur fjárfestingin á hundruðum milljóna króna. „Það hefur enginn aðili staðið í einkarekstri í þessum bransa áður þannig að segja má að við séum að fara út á óplægðan akur. Þetta er það sem óskað hefur verið eftir og það verður spennandi að sjá hvernig markaðurinn bregst við,“ segir Bragi Már og bætir við að nýju bátar fyrirtækisins séu þeir öflugustu hér á landi.

Ekki er langt um liðið frá því að nær öll starfsemi Icetugs lagðist af. Á árunum eftir hrun var lítið sem ekkert um að vera hjá fyrirtækinu og það var ekki fyrr en árið 2016 sem farið var af stað af fullum krafti að nýju.

„Það gerist í raun ekkert eftir hrunið enda pökkuðu menn bara saman þegar október 2008 kom. Við keyptum síðan Togarann, úthafsbát, árið 2016 ásamt því að bæta við okkur olíupramma. Í framhaldinu, eða fyrr í vetur, keyptum við síðan nýju dráttarbátana þrjá frá hollenskum skipasala. Bátarnir höfðu verið gerðir út í Afríku, en þaðan voru þeir fluttir hingað til lands,“ segir Ægir Örn.

Lesa má ítarlegt viðtal við bræðurna í ViðskiptaMogganum í dag.