HB Grandi styrkir stöðu sína í Asíu

HB Grandi hefur gert Útgerðarfélagi Reykjavíkur tilboð um kaup á öllu hlutafé í sölufélögum í Japan, Hong Kong og á meginlandi Kína, sem og á þjónustufélagi á Íslandi sem tengist framangreindum félögum. 

Útgerðarfélag Reykjavíkur hefur samþykkt kauptilboðið og félögin undirritað kaupsamninga, en öll hin keyptu félög eru í fullri eigu Útgerðarfélags Reykjavíkur, sem er þannig seljandinn í málinu, að því er fram kemur í tilkynningu frá HB Granda vegna málsins.

Kaupverðið samsvarar alls 31,1 milljón evra fyrir allt hlutafé allra félaganna, en kaupin eru gerð með fyrirvara um samþykki stjórna HB Granda og Útgerðarfélags Reykjavíkur, sem og samþykkt hluthafafundar HB Granda, en fyrirhugað er að kaupverðið verði greitt með útgáfu tæplega 134 milljóna nýrra hluta í HB Granda til Útgerðarfélags Reykjavíkur, sem verður þannig eigandi samtals 42,31% heildarhlutafjár í HB Granda.

Unnin verður áreiðanleikakönnun á hinum keyptu félögum og skýrsla um kaupin samkvæmt lögum um viðskipti tengdra aðila og verður hún kynnt hluthöfum með fundarboði. Er tilgangur kaupanna að styrkja stöðu HB Granda og sjávarútvegs á Íslandi á mikilvægum og vaxandi mörkuðum í Asíu, að því er fram kemur í tilkynningu.

• Blogga um frétt