Tvö útköll vegna báta á Norðurlandi

Björgunarsveitir á Norðurlandi voru kallaðar út tvisvar í dag með klukkutíma millibili vegna báta sem voru í vandræðum annars vegar austur af Siglunesi og hins vegar við Hjalteyri.

Austur af Siglunesi hafði bátur orðið vélarvana um stund og kallaði áhöfnin eftir aðstoð. Björgunarskipið Sigurvin frá Siglufirði sigldi í átt að bátnum ásamt nærtækum bátum frá svæðinu og björgunarbátur frá Ólafsfirði, segir Davíð Már Bjarnason, upplýsingafulltrúi Landsbjargar, í samtali við mbl.is.

Áhöfnin náði þó að koma vélinni í gang áður og sigla fyrir eigin vélarafli til baka.

Við Hjalteyri var lítill smábátur staddur nokkur hundruð metra frá landi þegar hann fékk aðskotahlut í skrúfuna. Skipstjórinn var einn um borð og náði að koma niður akkeri sem hélt honum kyrrum þangað til hvalaskoðunarbátur kom á vettvang og dró hann í land.

• Blogga um frétt