Byrjar betur en á síðasta ári

„Vertíðin fer betur af stað nú en í fyrra,“ segir Hjalti Einarsson, skipstjóri á Víkingi AK, sem kom til Vopnafjarðar síðdegis í gær með um 790 tonn af makríl.

Þetta er önnur veiðiferð skipsins en áður hefur Venus NS landað tvívegis á Vopnafirði. Er makrílvinnsla því komin í fullan gang hjá upppsjávarfrystihúsi HB Granda.

Hjalti segir erfitt að ráða í upphaf vertíðarinnar.

„Hitaskilin eru nú mun vestar en fyrri ár en við höfum mest verið að veiðum suður af Vestmannaeyjum. Sjávarhitinn er um 11-12 gráður og aflinn hefur sveiflast mjög mikið. Stundum höfum við fengið góð hol en svo lítið sem ekkert þess á milli. Við hefðum gjarnan viljað finna makríl í veiðanlegu magni austar en menn hafa ekki gefið sér nægan tíma til að leita nægilega vel,“ segir hann.

„Svo liggur munurinn milli ára ef til vill í því að sumarið í ár er mun bjartara og hlýrra en sumarið í fyrra.“

Makríllinn gengur upp með vestur- og austurströnd landsins og hefur orðið vart við makríl inni á höfnum á Suðurnesjum en ekki heyrst af því að uppsjávarskip hafi fengið afla vestanlands, segir á vef HB Granda.

Makríllinn eigi það til að ganga á síldarslóð en Hjalti segir að það hafi gengið blessunarlega vel að forðast að fá síld með makrílnum sem aukaafla í þessari veiðiferð.

• Blogga um frétt