„Hann flýtur enn, sýnist mér út um gluggann,“ segir Halldór Karl Hermannsson, hafnarstjóri í Reykjaneshöfn, í samtali við mbl.is. Hann vonast til þess að í næstu viku verði unnt að koma gamla rússneska togaranum Orlik á land til að rífa hann.
Nú er verið að undirbúa aðkomu skipsins svo það megi draga í land. Þar stendur til að rífa það og koma brotajárninu í not, selja það. Á meðan er togarinn í sívöktun, enda væri „skelfilegt“ ef hann sykki, að sögn Halldórs.
Halldór Karl Hermannsson, hafnarstjóri í Reykjaneshöfn, vill losna við Orlik sem fyrst.
Ljósmynd/Reykjaneshöfn
þegar hún sökk þar árið 2015.
Orlik hefur legið við festar í Reykjaneshöfn í fimm ár og í fyrradag var sagt frá því að togarinn væri hálfsokkinn. Það tókst að forða því. Í samtali við Morgunblaðið í dag segir Halldór flókið að sigla skipum í niðurrif þar sem samþykki þurfi hjá öllum löndum sem siglt er framhjá á leiðinni.
Gísli Gíslason, formaður Hafnasambands Íslands og einnig hafnarstjóri Faxaflóahafna, segir þar að það hafi sýnt sig í máli Orliks hve hægt förgun á bátum og skipum gangi hægt fyrir sig hér á landi.
Sigrún Ágústsdóttir, staðgengill forstjóra Umhverfisstofnunar, segir við Morgunblaðið að sótt hafi verið um að rífa Orlik í fjöru en því hafi verið hafnað þar sem nýlegar reglur segi til um að niðurrif skipa þurfi að fara fram í skipasmíðastöð þar sem réttur mengunarvarnarbúnaður sé til staðar. Skipasmíðastöð Njarðvíkur hafi leyfi heilbrigðiseftirlitsins fyrir 500 tonna skipi en Orlik sé mun stærra. Best hefði verið að sigla skipinu utan til niðurrifs en úr því sem komið væri hefði ráðherra fallist á að atvinnumenn í niðurrifi fengju að nota búnað Skipasmíðastöðvar Njarðvíkur án þess að skipið yrði sett í rennuna að því gefnu að tryggt yrði að mengandi efni færu ekki í vatn eða jarðveg.