Makrílveiðar fara fyrr af stað en síðustu ár. Makríllinn þykir stærri og feitari en á síðasta ári, en hann er áfram jafn brellinn og brögðóttur. 200 mílur athuguðu stöðu veiðanna.

„Það eru miklar sveiflur í makrílveiðunum hjá okkur litlu bátunum og þvílíkur dagamunur,“ sagði Unnsteinn Þráinsson, skipstjóri á bátnum Sigga Bessa SF-97. Unnsteinn var úti á miðunum á þriðjudag þegar blaðamaður sló á þráðinn til hans.

„Við erum búnir að vera á ferðinni síðan í morgun og svamla hérna fram og til baka. Með litlum árangri,“ sagði hann og benti á að makríllinn sé óvenjusnemma á ferðinni í ár, en oft hafi veiðarnar verið rétt að fara af stað um þetta leyti. Einnig sé hann mun betur haldinn, stærri og feitari, en oft áður.

Ekki veðrinu um að kenna

„Sumarið var fyrr á ferðinni og kannski þess vegna kom hann fyrr til okkar. Þess vegna fóru menn líka ef til vill fyrr af stað í veiðarnar,“ sagði hann og bætti við að veðrið væri búið að leika við makrílveiðimenn.

„Þetta er allt annað en í fyrra. Svo að það er ekki veðrinu um að kenna núna. En þetta er bara svona brellinn fiskur. Einn daginn er fullt af honum og næsta dag er allt horfið. Það voru líka sveiflur á síðasta ári og það er sama sagan núna. Við mokuðum inn í gærmorgun en svo var veiðin dottin niður aðeins nokkrum tímum seinna. Maður veit aldrei að hverju maður gengur þegar maður fer út á morgnana.“

Ítarlegri umfjöllun er að finna í ViðskiptaMogganum, sem fylgdi Morgunblaðinu í gær.

Tengdar fréttir

Smábátaveiðar

Ánægður með nýja Sigrúnu Björk ÞH

• Lokun Skápsins tvímælalaust að skila sér
• „Leggjum línuna hvenær sem veður leyfir“
• Náðu 10 tonnum í mokveiði
• Fordæma vinnubrögð og mótmæla tillögum

» Fleiri tengdar fréttir