Tugir grindhvala á Pollinum

„Það er erfitt að telja þá en þetta eru um 20 til 40 stykki,“ segir Arnar Sigurðsson, skipstjóri á hvalaskoðunarskipinu Hólmasól, þar sem hátt í 200 farþegar berja þessa tugi óvæntu gesti augum.

Fréttaritari mbl.is á Akureyri myndaði grindhvalina og drekkhlaðin hvalaskoðunarskip Eldingar, en grindhvalir hafa ekki áður heimsótt Pollinn svo vitað sé til.

Hólmasól er drekkhlaðin í dag. mbl.is/Þorgeir

„Við erum ekki vön að fá þessa tegund inn á Poll til okkar,“ segir Arnar í samtali við mbl.is. „Þetta er í fyrsta skipti sem það hefur gerst, að minnsta kosti síðan við fórum að stunda hvalaskoðun. Grindhvalir hafa komið inn í Eyjafjörðinn og inn undir Dagverðareyri, en ekki inn á Poll.“

Grindhvalirnir vekja eðlilega mikla athygli og eru ferðir Eldingar á Akureyri þéttskipaðar í dag. „Við fórum út núna á tveimur bátum og það er líka mikið bókað í næsta túr. Svo eru bæjarbúar forvitnir um þetta og eru búnir að raða bílunum meðfram sjónum.“

„Við fórum út núna á tveimur bátum og það er líka mikið bókað í næsta túr.“ mbl.is/Þorgeir

Arnar Sigurðsson, skipstjóri á Hólmasól. mbl.is/Þorgeir

• Blogga um frétt