Komu vöðunni á haf út

Björgunarsveitum tókst að koma stærðarinnar grindhvalavöðu út fyrir fjöru við Ólafsvík seint í gærkvöldi. Fjórir hvalir strönduðu, þremur tókst að komast á haf út af sjálfsdáðum en einn drapst í flæðarmálinu. 

Fréttaritari Mbl.is á svæðinu, Alfons Finnsson, segist ekki sjá til vöðunnar lengur. Hann telur þó ekki útilokað að hana beri að landi síðar. 

Að sögn Davíðs Más Bjarnasonar, upplýsingafulltrúa Landsbjargar, fór björgunarsveitarfólk út á bátum og reyndi að reka vöðuna út. Tókst því meðal annars að bjarga einu dýri sem var við það að stranda. 

Frétt af mbl.is

Reyna að bjarga grindhvölum við Ólafsvík

Þá segir Alfons að starfsmenn Hafrannsóknastofnunar hafi verið á svæðinu í gærkvöld og reiknar hann með að þeir hafi tekið sýni af hvalshræinu. Einnig var mikill fjöldi ferðamanna á svæðinu. 

Grindhvalavaðan taldi líklega um hundrað hvali og var hún á sveimi um 100 til 200 metrum frá ströndinni seinnipartinn í gær og fram á kvöld.

Uppfært 12:10

Sérfræðingar frá Hafrannsóknarstofnun mældu grindhvalshræið og tóku úr því sýni skömmu fyrir hádegi í dag. 

Ferðamenn reyna að koma hvalnum á haf út. Mbl.is/Alfons

Sérfræðingar Hafrannsóknarstofnunar taka sýni úr hræinu. Mbl.is/Alfons

• Blogga um frétt