Samfelld makrílvinnsla fyrir austan

„Við fengum þessi 1.100 tonn á einum degi úti í miðri Smugunni eða 350 mílur austnorðaustur úr Norðfjarðarhorni. Flotinn hefur verið í Smugunni að undanförnu og hefur farið þar svolítið fram og til baka. Nú er fiskurinn sem veiðist töluvert blandaður hvað stærð varðar, en áður fékkst mest mjög stór fiskur,“ segir Tómas Kárason, skipstjóri á Beiti, en vinnsla á þessum 1.100 tonnum af makríl hófst í Neskaupstað í gær.

Í fiskiðjuveri Síldarvinnslunnar þar hefur verið samfelld makrílvinnsla að undanförnu og hefur hún gengið vel, að því er fram kemur á vef útgerðarinnar.

Lokið var við að landa um 1.200 tonnum úr Berki NK í gær og þá hófst vinnsla úr Beiti. Þá mun Bjarni Ólafsson AK vera á landleið með 835 tonn.

„Vertíðin hefur gengið afar vel til þessa og vinnslan hefur ávallt haft næg verkefni og það er einmitt það sem skiptir mestu máli,“ segir Tómas.

• Blogga um frétt