Samherji hagnaðist um 8,7 milljarða árið 2018

Útgerðarfélagið Samherji hf. hagnaðist um 8,7 milljarða króna á síðasta ári, en fyrirtækið birti rekstrarniðurstöðu sína á heimasíðu sinni í dag. Tekjur fyrirtækisins námu um það bil 43 milljörðum í heildina.

Fram kemur á vef félagins að ákveðið hafi verið á aðalfundi að greiða 7,7% af hagnaði ársins í arð til hluthafa, eða sem nemur um 670 milljónum króna.

Á vef Samherja er haft eftir Þorsteini Má Baldvinssyni forstjóra fyrirtækisins að rekstrarniðurstaðan sé góð, en árið 2018 hafi verið sérstakt að því leyti að þetta var fyrsta heila árið sem Samherji gerði ekki út neinn bolfiskfrystitogara frá Íslandi.

„Félagið hóf rekstur með einum frystitogara og þeir hafa í gegnum tíðina gegnt veigamiklu hlutverki í rekstri okkar þannig að þetta er mikil breyting á fyrirtækinu. Sjófrystingu á uppsjávarfiski lauk einnig á árinu með sölu á Vilhelm Þorsteinssyni EA sem hefur verið eitt fengsælasta skip Íslandssögunnar,“ segir forstjórinn.

Umfjöllun á vef Samherja

• Blogga um frétt