Beðið með að draga hræ Hibba á haf út

Til stóð að draga hræ háhyrningsins, sem strandaði við höfnina við Þórshöfn á Langanesi í fyrrakvöld, á haf út á háflóði í dag. Þeirri aðgerð hefur verið frestað vegna slæmra veðurskilyrða, en reyna á síðar þegar veðurskilyrði batna. 

Að sögn Líneyjar Sigurðardóttur, fréttaritara Morgunblaðsins og mbl.is á Þórshöfn, stendur til að björgunarsveitin Hafliði á Þórshöfn komi taug í hræið og báturinn Gunnar KG muni siðan draga það á haf út. Guðmundur Jóhannsson, útgerðarmaður á Gunnari KG, segir að nú sé stíf norðvestanátt og mikil kvika úti fyrir og því kæmist báturinn ekki nógu langt út með hræið. „Ef ekki er farið með það nógu langt út rekur það bara aftur upp í fjöru,“ segir Guðmundur. Því verður beðið hagstæðara veðurs. 

Björgunarsveitinni tókst að stugga háhyrningnum, sem björgunarsveitarmenn gáfu nafnið Hibbi, úr höfninni á föstudaginn, en hann kom aftur að landi og fannst dauður í fjörunni á laugardagsmorguninn. 

Frétt af mbl.is

Strandaði að nýju og drapst

• Blogga um frétt