Gullver og Smáey lönduðu fullfermi

Ísfisktogararnir Gullver NS og Smáey VE lönduðu báðir fullfermi á Seyðisfirði í gær. Afli Gullvers var 105 tonn af þorski og ýsu. Smáey mætti til Seyðisfjarðar með 70 tonn af ýsu, þorski og ufsa. Var þetta fyrsta veiðiferð beggja skipa á nýju kvótaári.

„Það má segja að þetta nýja kvótaár hafi byrjað afar vel. Við vorum að veiðum á Glettinganes- og Tangaflaki og aflinn var góður allan tímann. Við komum inn um hádegi í gær og það var haldið til veiða strax að löndun lokinni klukkan 10 í gærkvöldi,“ er haft eftir Rúnari L. Gunnarssyni, skipstjóra á Gullveri, á vef Síldarvinnslunnar.

Þar tekur Hilmar Jón Stefánsson, skipstjóri á Smáey, undir með Rúnari. „Í þessum túr vorum við að veiða á Mýragrunni, Utanfótar og á Tangaflaki og vorum ágætlega sáttir við aflann.“

• Blogga um frétt