Túrinn gekk ekkert allt of vel

Ísfisktogarinn Helga María AK, sem var í leiguverkefni á Grænlandi í sumar, er nú í sínum öðrum túr undir stjórn Friðleifs Einarssonar, sem áður var skipstjóri á Engey RE, að því er segir á vef Brims. Áhöfn Helgu Maríu var áður á Engey sem seld var til Rússlands í vor.

„Þetta var langt sumarfrí en ég notaði það m.a. til að vera á strandveiðum. Það er þó gott að komast aftur á togveiðar og með mér er sá fasti kjarni manna sem voru með mér á Ásbirni RE og svo á Engey,“ er haft eftir Friðleifi.

Skipstjórinn segir fyrsta túrinn eftir sumarfrí ekki hafa gengið allt of vel. „Aflinn var um 65 tonn, mest þorskur, og það var ýmislegt sem hafði áhrif á aflabrögðin. Fyrir það fyrsta þá var ekki mikið af fiski og sömuleiðis tekur það mann sinn tíma að læra á skipið. Þetta er hörkufínt skip en allt öðruvísi en Engey og Ásbjörn ef út í það er farið.“

Hann kveðst hafa byrjað í kantinum vestan við Halann en síðan hafi hann unnið sig inn á Halamið. „Stefnan er svo sett á Vestfjarðamið að nýju. Við stoppuðum ekki nema sólarhring í Reykjavík og mér sýnist ekki veita af tímanum, sérstaklega ef við þurfum að leita mikið að fiskinum,“ segir Friðleifur Einarsson.

• Blogga um frétt