Reyna áfram við makrílinn

„Ég á von á að komast út seint í kvöld eða nótt og það verður áfram haldið að reyna við makrílinn. Síldin bíður betri tíma en mér skilst þó að Venus NS muni eitthvað kíkja á síld á heimleiðinni næst þegar skipið kemur inn,“ sagði Albert Sveinsson, skipstjóri á Víkingi AK, í dag samkvæmt vef Brims hf. en rætt var við hann á Vopnafirði í dag.

Rætt var einnig við Hjalta Einarsson sem var skipstjóri á Víkingi AK í síðustu veiðiferð en skipið kom til Vopnafjarðar með um 770 tonna afla í gærmorgun. „Það var rólegt yfir veiðinni og greinilegt að það er að draga úr makrílgengdinni í Síldarsmugunni. Þá er veðráttan að versna og meira um kaldafýlur en í sumar. Þetta gerir alla leit erfiðari. Makríllinn virðist nú halda sig á litlum blettum mjög víða og er fljótur að veiðast upp. Það er ekkert greinilegt göngumynstur á makrílnum og veiðin getur stundum komið upp á ólíklegustu stöðum,“ sagði Hjalti og Albert tók undir með honum.

„Á tímabili virtist makríllinn hreinlega hringsóla á stóru hafsvæði. Það er vafalaust ætið sem veldur því hvert makríllinn stefnir hverju sinni. Það getur snögglega komið upp veiði nyrst í Síldarsmugunni á sama tíma og veiðin er góð syðst,“ sagði Albert enn fremur. Þá segir að makríllinn sem veiðst hafi í sumar og haust sé stór og henti vel til vinnslu. Meðalvigtin hafi aðeins lækkað eftir því sem liðið hafi á haustið en í þessari síðustu veiðiferð Víkings hafi hún verið 450-460 grömm.

• Blogga um frétt