Bergey ekki lengur rauð

Bergey VE verður afhent nýjum eiganda á næstu dögum og mun það fá nafnið Runólfur, en skipið hefur verið selt Guðmundi Runólfssyni hf. í Grundarfirði, að því er fram kemur á vef Síldarvinnslunnar.

Þar segir að Bergey hafi verið smíðuð í Póllandi árið 2007 fyrir Berg-Hugin, dótturfélag Síldarvinnslunnar í Vestmannaeyjum. Síðustu daga hefur skipið verið í slipp í Vestmannaeyjum þar sem gengið hefur verið frá því til afhendingar. Þar var meðal annars málað yfir rauða litinn sem ávallt hefur prýtt Bergey og er hún nú orðin blá.

Ný Bergey, sem er í smíðum hjá skipasmíðastöðinni Vard í Aukra í Noregi, verður væntanlega afhent Bergi-Hugin hinn 26. september.

Bergey eða öllu heldur Runólfur. Ljósmynd/Guðmundur Alfreðsson

• Blogga um frétt