Ánægja með byrjun síldveiða

Venus NS, togari Brims, kom til Vopnafjarðar síðdegis í dag með 1.260 tonn af síld. Síldin fékkst í fjórum holum á um sólarhring í Héraðsflóadjúpi en frá veiðisvæðinu er um fimm tíma sigling til Vopnafjarðar.

Bergur Einarsson,skipstjóri á Venusi, kveðst ánægður með byrjun síldveiðanna, í viðtali á vef sjávarútvegsfyrirtækisins.

„Þetta er okkar annar hreini síldveiðitúr en fyrir helgina vorum við á Vopnafirði með 1.360 tonna afla. Við byrjuðum reyndar á um 600 tonnum af síld sem við fengum í lok makrílveiðiferðar þannig að við erum alls komnir með um 3.200 tonn af síld,“ er haft eftir Bergi.

Rígvæn síld

Bergur átti allt eins von á því að síldin væri gengin út úr Héraðsflóanum og segir að það hafi því komið þægilega á óvart að þar hafi verið mikið af síld er Venus kom á miðin.

„Það er eins og síldin hafi gengið út í kantinn og snúið þar við í stað þess að ganga lengra út á djúpið. Þetta er allt rígvæn síld og hentar mjög vel til vinnslu,“ segir Bergur.

Tvö troll eru notuð um borð í Venusi. Þar af er annað nýtt 2048 Gloríu Helix síldarflottroll af svokallaðaðri 2019 útfærslu. Hefur það reynst vel.

• Blogga um frétt