Útgerðir FISK Seafood og Soffaníasar Cecilssonar í Grundarfirði tóku á laugardaginn við tveimur bátum sem leysa eldri skip af hólmi. Nýju bátarnir, Farsæll SH-30 og Sigurborg SH-12, komu inn til Grundarfjarðar laust eftir hádegi og tók fjölmenni þar á móti skipunum og áhöfnum þeirra við athöfn sem var hátíðleg.

Bátarnir, sem keyptir voru af Gjögri hf., verða gerðir út frá Grundarfirði og er þeim ætlað að sinna veiðum á til dæmis sólkola, skarkola og steinbít. Farsæll, skip frá 2009, hét í eigu fyrri útgerðar Áskell EA og er 362 brúttótonn. Sigurborgin, pólsk smíði frá 2006, var áður Vörður EA og er 485 brúttótonn.

„Núna erum við að fá smáa en knáa trollbáta sem vonandi munu gera okkur kleift að sækja á fleiri mið en fyrr, fjölga aflategundum og auka um leið rekstraröryggið,“ segir Friðbjörn Ásbjörnsson útgerðarstjóri um skipin nýju. Reiknað er með að gamli Farsæll SH og Sigurborg SH, sem nú víkja fyrir yngri skipum, verði seld og ef ekki fari þau í pottinn

Stórstígar breytingar

„Engum dylst að það eru tímar stórstígra breytinga í samfélaginu, sem eru þegar farnar að hafa mikil áhrif. Breytingarnar eru svo víðtækar að talað er um fjórðu iðnbyltinguna,“ sagði Björg Ágústsdóttir, bæjarstjóri í Grundarfirði, í ávarpi sem hún flutti við móttöku skipanna tveggja. „Þess vegna er það ánægjulegt að ekki síst sjávarútvegurinn er virkur þátttakandi í þeim tækni- og atvinnuháttabreytingum sem nú eiga sér stað. Með því skapar hann sér einmitt stöðu til að vera áfram undirstöðuatvinnuvegur þjóðarinnar.“

Ráðgert er að Farsæll fari til veiða um næstu helgi og er skipstjóranum uppálagt að veiða ýsu, kola og steinbít á Breiðafirði og Vestfjarðarmiðum. Níu menn verða eru í áhöfn Farsæls og hver túr verður sex dagar hið mesta.

Þórólfur Gíslason stjórnarformaður Fisk Seafood, Björg Ágústsdóttir bæjarstjóri í Grundarfirði og Friðbjörn Ásbjörnsson sem stýrir starfsemi Fisk Seefood í Grundarfirði. mbl.is/Alfons Finnsson

Ómar Þorleifsson er skipstjóri á Sigurborgu SH. mbl.is/Alfons Finsson

Tengdar fréttir

FISK Seafood

Kaupa 100 tonna kvóta af Saltveri

• 300 milljóna króna afla landað á Sauðárkróki
• Ný ytri höfn forsenda uppbyggingar
• Hafa landað 485 tonnum á Sauðárkróki
• Gott veður og ágætis veiði hjá Málmey

» Fleiri tengdar fréttir