Verðmæti afla 14 milljarðar í júlí

Verðmæti afla úr sjó nam tæpum 14 milljörðum í júlí samkvæmt fréttatilkynningu frá Hagstofunni sem er 35,6% aukning samanborið við júlí 2018.

Fram kemur að þar af hafi verðmæti botnfiskaflans verið 9,6 milljarðar og aukist um 49,2% en aukning hafi verið í aflaverðmæti allra helstu botnfisktegunda.

Verðmæti uppsjávarafla var rúmlega 3,3 milljarðar króna og jókst um 73,4%, mestmegnis vegna sölu á makríl. Aflaverðmæti flatfisktegunda nam 782 milljónum og verðmæti skelfiskafla var 253 milljónir.

Þá segir að verðmæti afla sem seldur var í beinni sölu útgerða til vinnslu innanlands hafi numið tæpum 6,2 milljörðum króna í júlí. Verðmæti sjófrysts afla nam tæpum 5,3 milljörðum og verðmæti afla sem seldur var á markað til vinnslu innanlands nam rúmum 1,8 milljörðum.

Miðað við 12 mánaða tímabili, frá ágúst 2018 til júlí 2019, nam aflaverðmæti úr sjó tæplega 140 milljörðum, sem er 11,7% aukning miðað við sama tímabil árið áður.

• Blogga um frétt