Þar sem öll greinin kemur saman

Guðbrandur Sigurðsson var meðal þeirra sem höfðu frumkvæði að fyrstu …
Guðbrandur Sigurðsson var meðal þeirra sem höfðu frumkvæði að fyrstu Sjávarútvegssráðstefnunni sem haldin er árlega. mbl.is/Árni Sæberg

Liðinn eru tíu ár síðan framsýnn hópur fólks kom saman til að skipuleggja fyrstu Sjávarútvegsráðstefnuna. Síðan þá hefur viðburðurinn vaxið og dafnað; þangað kemur fólk úr ýmsum áttum til að fræðast um stefnur og strauma í sjávarútvegi og styrkja tengslin innan greinarinnar.

Guðbrandur Sigurðsson átti, ásamt Kristjáni Hjaltasyni og fleira góðu fólki, veg og vanda að því að gera fyrstu Sjávarútvegsráðstefnuna að veruleika en hann vill eigna Valdimar Inga Gunnarssyni sjávarútvegsfræðingi hugmyndina: „Þetta var eftir hrun og var honum mjög í mun að fólk í sjávarútvegi kæmi saman til að ræða leiðir til að efla greinina og miðla fróðleik sín á milli. Fyrir þennan tíma höfðu sölu- og markaðsfyrirtækin haldið svokallaða verkstjórafundi en það starf hafði riðlast töluvert og á sama tíma einkenndist þjóðfélagsumræðan af afskaplega þungu og leiðinlegu tali um kvótamál. Okkur gömlu jöxlunum þótti leiðinlegt að sjá hvað sjávarútvegur var sýndur í neikvæðu ljósi, vitandi hve margt áhugavert og jákvætt væri að gerast innan greinarinnar.“

mbl.is/Styrmir Kári

Úr varð að kalla til fólk héðan og þaðan til að leggja drög að fjölbreyttum viðburði. „Okkur tókst að fá til liðs við verkefnið fagfólk frá alls kyns fyrirtækjum; bæði útgerðum og sölufyrirtækjum en líka þjónustufyrirtækjum af öllum toga, og stofnuðum um leið hlutafélag sem hefði það eina hlutverk að halda Sjávarútvegsráðstefnu ár hvert,“ útskýrir Guðbrandur.

Fjölbreyttur þverskurður

Þess var gætt strax í byrjun að haga skipulagi ráðstefnunnar þannig að hún yrði aldrei einhæf og að gestir hefðu gott tækifæri til að styrkja tengslin innan greinarinnar. Var t.d. hugað að því að hafa gott hlé á milli málstofa fyrir fundargesti að blanda geði og ræða málin, og sú regla sett að enginn mætti sitja í stjórn ráðstefnunnar nema í tvö ár samfleytt. Þá skyldi viðburðurinn ekki vera ætlaður innanbúðarfólki eingöngu, heldur opinn öllum þeim sem væru forvitnir um sjávarútveginn.

„Fyrir vikið á sér stað stöðug endurnýjun í hópi skipuleggjanda viðburðarins sem svo endurspeglast í síbreytilegum efnistökum,“ segir Guðbrandur og bætir við að með hjálp öflugra sjálfboðaliða og fjárframlögum góðra styrktaraðila hafi tekist að láta ráðstefnuna koma út réttu megin við núllið. „Stundum hefur viðburðurinn verið í plús, og stundum í mínus, en heilt yfir þessi tíu ár erum við ekki að koma út í tapi, enda farið mjög varlega með það fé sem kemur í kassann.“

Fáir eins vel undirbúnir fyrir fjórðu iðnbyltinguna

Gaman hefur verið að fylgjast með ráðstefnunum undanfarin ár, og sjá þar þverskurð af þeim mikla uppgangi sem verið hefur í greininni. Þó að efnahagsreikningur margra sjávarútvegsfyrirtækja hafi verið lemstraður eftir hrun voru aðstæður hagfelldar fyrir tíu árum og hefur greinin blómstrað síðan þá, samhliða því að árangurinn af margra ára rannsóknar- og þróunarstarfi hefur sprungið út.

„Sjávarútvegsfyrirtækin hafa reynst vera mjög opin fyrir nýjungum og fús að vinna með tæknifyrirtækjum að þróun nýrra lausna. Raunar er nú svo komið að fáar atvinnugreinar á Íslandi eru jafn langt þróaðar og sjávarútvegurinn, eða eins vel undirbúnar fyrir fjórðu iðnbyltinguna sem er handan við hornið,“ segir Guðbrandur. „Víða gengur mjög vel, fyrirtækin eru reiðubúin að ráðast í metnaðarfullar fjárfestingar og eru að þreifa fyrir sér á nýjum slóðum, og smitast árangurinn út í aðrar greinar tengdar sjávarútvegi.“

mbl.is/Styrmir Kári

Bara þann tíma sem Guðbrandur hefur verið viðriðinn sjávarútveg hafa þar orðið stórstígar framfarir. Hann settist nýlega í framkvæmdastjórastólinn hjá Borgarplasti, en hann byrjaði hjá Íslenskum sjávarafurðum um miðjan 9. áratuginn og var árið 1996 ráðinn framkvæmdastjóri Útgerðarfélags Akureyringa.

„Þá voru afköstin við vinnslu á þorski um 14 kg á manntímann og þegar ég skipti um starfsvettvang átta árum síðar var sú tala komin upp í hartnær 35 kg, þökk sé aukinni tæknivæðingu. Í dag er ekki óalgengt að afköst á hvern starfsmann í fiskvinnslu séu á bilinu 65-90 kg á klukkustund og á sama tíma eru vélarnar að losa starfsfólkið við mörg erfiðustu og einhæfustu verkin.“

Þarf að höfða til unga fólksins

Ekki er útlit fyrir annað en að á komandi áratug muni þróunin halda áfram í sömu átt. Guðbrandur nefnir verkefni á borð við Sjávarklasann þar sem nýsköpunin blómstrar, en jafnt stór sem smá sjávarútvegsfyrirtæki virðast leggja sig fram við að sinna alls kyns þróunarstarfi af metnaði. „Það sem reynslan sýnir okkur er að þróunarstarfið skilar sér ótrúlega fljótt inn í rekstur fyrirtækja og vonandi að greinin beri gæfu til að halda sig á þessari braut.“

Hefur Guðbrandur helst áhyggjur af að erfiðlega geti gengið að vekja áhuga unga fólksins á því að leggja það fyrir sig að starfa í sjávarútvegi. Eftir hrun jókst til muna aðsókn í hvers kyns sjávarútvegstengt nám og hefur bæst við námsframboðið bæði á háskóla- og framhaldsskólastigi.

„En eftir sem áður er margt sem togar í unga fólkið að leggja eitthvað annað fyrir sig. Er áríðandi að því verði komið vel til skila að það sé eftirsóknarvert að vinna í sjávarútvegi og að spennandi verkefni bíði fólks með góða tækni- og iðnmenntun,“ segir hann. „Störfin í sjávarútvegi hafa breyst, í takt við breytingarnar í greininni almennt, og einkennast ekki síst af því að vera skapandi störf þar sem þarf að finna góðar lausnir á fjölbreyttum vandamálum. Þetta eru störf þar sem fólk getur séð afrakstur vinnunnar með eigin augum og vita þeir sem reynt hafa hvað það er uppskrift að mikilli starfsánægju að hafa t.d. átt þátt í því að þróa nýja vinnsluaðferð eða hanna nýja tækni.“

Viðtalið var birt í 200mílum sem gefið var út 31. október.

Þessi grein birtist
í Morgunblaðinu
Áskrifendur:
Þessi grein birtist
í Morgunblaðinu
Áskrifendur:
Fleira áhugavert
Afurð Dags. Meðalverð
Þorskur, óslægður 27.3.24 399,05 kr/kg
Þorskur, slægður 27.3.24 443,15 kr/kg
Ýsa, óslægð 27.3.24 178,91 kr/kg
Ýsa, slægð 27.3.24 136,03 kr/kg
Ufsi, óslægður 27.3.24 112,26 kr/kg
Ufsi, slægður 27.3.24 189,28 kr/kg
Gullkarfi 27.3.24 142,36 kr/kg
Litli karfi 27.3.24 8,00 kr/kg
Blálanga, óslægð 11.3.24 50,00 kr/kg
Blálanga, slægð 27.3.24 120,00 kr/kg

Fleiri tegundir »

27.3.24 Hrefna ÍS 267 Landbeitt lína
Steinbítur 10.108 kg
Þorskur 718 kg
Ýsa 71 kg
Samtals 10.897 kg
27.3.24 Petra ÓF 88 Grásleppunet
Grásleppa 1.233 kg
Þorskur 118 kg
Skarkoli 6 kg
Rauðmagi 4 kg
Þykkvalúra 3 kg
Ufsi 2 kg
Samtals 1.366 kg
27.3.24 Júlía SI 62 Grásleppunet
Grásleppa 2.299 kg
Þorskur 251 kg
Rauðmagi 20 kg
Skarkoli 6 kg
Samtals 2.576 kg

Skoða allar landanir »

Fleira áhugavert
Afurð Dags. Meðalverð
Þorskur, óslægður 27.3.24 399,05 kr/kg
Þorskur, slægður 27.3.24 443,15 kr/kg
Ýsa, óslægð 27.3.24 178,91 kr/kg
Ýsa, slægð 27.3.24 136,03 kr/kg
Ufsi, óslægður 27.3.24 112,26 kr/kg
Ufsi, slægður 27.3.24 189,28 kr/kg
Gullkarfi 27.3.24 142,36 kr/kg
Litli karfi 27.3.24 8,00 kr/kg
Blálanga, óslægð 11.3.24 50,00 kr/kg
Blálanga, slægð 27.3.24 120,00 kr/kg

Fleiri tegundir »

27.3.24 Hrefna ÍS 267 Landbeitt lína
Steinbítur 10.108 kg
Þorskur 718 kg
Ýsa 71 kg
Samtals 10.897 kg
27.3.24 Petra ÓF 88 Grásleppunet
Grásleppa 1.233 kg
Þorskur 118 kg
Skarkoli 6 kg
Rauðmagi 4 kg
Þykkvalúra 3 kg
Ufsi 2 kg
Samtals 1.366 kg
27.3.24 Júlía SI 62 Grásleppunet
Grásleppa 2.299 kg
Þorskur 251 kg
Rauðmagi 20 kg
Skarkoli 6 kg
Samtals 2.576 kg

Skoða allar landanir »