Togari strandaði á Enni

Ekkert manntjón varð þegar uppsjávarskipið Arctic Voyager strandaði á Enni í Fuglafirði á Austurey í Færeyjum rétt fyrir miðnætti í gærkvöldi. Skipið hafði lagt af stað úr höfn eftir að hafa landað í höfninni í firðinum þegar atvikið átti sér stað.

Fram kemur í umfjöllun ríkisútvarps Færeyja (Kringvarp Føroya) að aðeins fjórir hafa verið um borð þegar skipið strandaði og að björgunarbáturinn Ziska hafi verið sendur af stað til aðstoðar. Fyrir tilviljun var skip Landhelgisgæslunnar, Brimil, í höfn í Fuglafirði og gat einnig veitt aðstoð.

Frá strandstað. Ljósmynd/Tórik Ábraham Rouah

Vísbendingar eru um að skipið hafi verið á meiri hraða en ráðlagt er á umræddu svæði þegar það sigldi að landi og lagði upp í brekku.

Samkvæmt heimildum fréttastofu Kringvarpsins urðu tiltölulega litlar skemmdir á skipinu og var lítið magn af sjó sem lak inn í skipið að framanverðu. Tókst vel til að losa skipið og var snúið til hafnar.

• Blogga um frétt