17 þúsund tunnur af saltsíld

Nóg er að gera í Loðnuvinnslunni og er verið að vinna 650 tonn af síld sem Hoffell kom með að bryggju í gærkvöldi. „Um er að ræða íslenska síld sem er sumargotssíld og skilur þar á milli norsk-íslensku síldarinnar sem er vorgotssíld. Því eru þessir mánuðir snemma vetrar aðal veiðitími íslensku síldarinnar,“ segir á vef Loðnuvinnslunnar.

Haft er eftir Grétari Arnþórssyni, verkstjóra síldarverkunar fyrirtækisins, að um sé að ræða fína síld sem er söltuð í flök og bita. Hún verður síðan send til Kanada, Svíþjóðar og Danmerkur. Hann segir að áætlað sé að saltað verði í um 17 þúsund tunnur af síld á þessu ári.

Loðnuvinnslan er eini framleiðandi saltsíldar sem eftir er á landinu. mbl.is/Albert Kemp

Mikið gæðaeftirlit er með vinnslu síldar og segir Grétar vinnsluna hafa gengið vel enda sé Loðnuvinnslan vel búin tækjum og vélbúnaði sem gerir það að verkum að aðeins þurfi að mata og hafa eftirlit.

Þá segir á vef Loðnuvinnslunnar að síldarverkun hafi tekið miklum breytingum „frá þeim tíma að konur stóðu og skáru og söltuðu síld og karlar sáu um  önnur störf í kring. Þá var hægt að spjalla saman og gjarnan kallað hátt þegar það vantaði tunnu eða salt. En nútíminn er annar, nú sinna bæði konur og karlar vélunum og vegna hávaða er ekki hægt að spjalla við vinnuna.“

Verkstjórinn segir þó aðstæður nú „miklu betri“ enda hafi eldri aðferð verið mun erfiðari.

Síld á færibandi Loðnuvinnslunnar. mbl.is/Albert Kemp

• Blogga um frétt