Átta endurskoða aflareglu fyrir þorsk

Kristján Þór Júlíusson, sjávarútvegs- og landbúnaðarráðherra, hefur skipað nefnd til að endurskoða aflareglu fyrir þorsk, að því er fram kemur á vef Stjórnarráðsins. Þar segir að horft verði til þess að „aflareglan skili hámarksafla, uppfylli kröfur um varúðarsjónarmið auk þess sem veiðar séu hagkvæmar og vistspor þeirra lágt“.

Frétt af mbl.is

Ráðherra fylgir Hafró í öllu

Bent er á að núgildandi aflaregla hafi verið í gildi frá 2007 og felur hún í sér að „veiðihlutfallið sé 20 prósent af viðmiðunarstofni, sem er fjögurra ára þorskur og eldri, að því tilskildu að hrygningarstofninn sé metinn yfir gátmörkum, en til að draga úr sveiflum í afla vegur kvóti ársins á undan jafnt og 20 prósent veiðihlutfallið.“

Alþjóðahafrannsóknaráðið (ICES) yfirfór aflaregluna árið 2009 og var hún endurskoðuð árin 2014 og 2015. Þá var hún framlengd óbreytt til fimm ára.

Frétt af mbl.is

Auka þurfi þorskveiði vegna brests

Átta munu eiga sæti í nefndinni sem ætlað er að endurskoða aflareglu samkvæmt frétt á vef Stjórnarráðsins. Verður einn fulltrúi tilnefndur af Hafrannsóknastofnun, einn frá Háskólanum á Akureyri, einn frá Háskóla Íslands, einn frá Landssambandi smábátasjómanna, einn frá Samtökum fyrirtækja í sjávarútvegi, einn samkvæmt sameiginlegri tilnefningu Samtaka sjómanna og loks tveir starfsmenn ráðuneytisins.

Nefndin er þannig skipuð:

Árni Bjarnason (Samtök sjómanna)

Edda Elísabet Magnúsdóttir (HÍ)

Guðmundur Þórðarson (Hafró)

Guðrún Arndís Jónsdóttir (HA)

Kristján Þórarinsson (SFS)

Örn Pálsson (LS)

Brynhildur Benediktsdóttir og Sigurgeir Þorgeirsson (formaður) án tilnefningar.

• Blogga um frétt