„Klárlega erfiðara að ná í fiskinn“

„Það er búið að vera rólegt,“ segir Njáll Gíslason, skipstjóri frystitogarans Júlíusar Geirmundssonar ÍS-270, sem gerður er út af Hraðfrystihúsinu Gunnvör. „Það hefur verið heldur lítil veiði síðustu tvo mánuði fyrir frystitogarana. Það hefur verið betra hjá þeim sem eru aðallega í þorski en samt lítið hjá þeim líka,“ útskýrir hann.

Veðrið hefur verið ágætt að sögn Njáls, en togarinn er staddur norðvestur af landinu í leit að ufsa og karfa í 24 daga túr. „Þetta er með lélegri haustum sem maður er að sjá, en það koma góðir dagar inni á milli.“

Blængur NK-125 Ljósmynd/Hákon Ernuson

„Við erum að reyna að fá karfa og ufsa en það finnst lítið af ufsa og hefur verið lítið af honum í haust,“ segir Bjarni Hjálmarsson, skipstjóri á frystitogara Síldarvinnslunnar Blængs NK 125, sem staddur er vestur af Vestfjörðum. „Það er nú heldur rólegt yfir miðunum,“ bætir hann við og segir ástandið á miðunum hafa verið leiðinlegt í haust.

„Það er alveg klárlega erfiðara að ná í fiskinn nú en síðustu haust.“ Bjarni segir túrinn óvenju stuttan að þessu sinni, 19 daga, og er stefnt að því að koma í land 28. nóvember.