Fiskur og franskar í Grindavík

Vænst er minnst 1.000 manns í mat hjá Þorbirninum hf. í Grindavík í kvöld þegar þar verða á borðum fiskur og franskar upp á breska vísu. Þetta er hluti af bæjarhátíðinni Fjörugur föstudagur sem haldinn hefur verið í Grindavík í aðdraganda aðventunnar mörg undanfarin ár, þar sem er opið hús og bryddað upp á ýmsu skemmtilegu hjá fyrirtækjum við Hafnargötu.

Þorbjörninn hefur lengi séð fyrirtækinu The Chesterford Group sem rekur veitingastaðina Fish ´n chickn og Churchill´s fyrir hráefni og selur því um 150 tonn af þorskflökum af ári hverju. Djúpsteiktur fiskurinn er matreiddur og seldur 40-45 veitingastöðum fyrirtækisins, sem eru flestir í London og nágrenni. Utan fara flökin með roðinu og með því í steikarpottana.

„Við byrjuðum árið 2013 og veislan hér í húsi verður æ stærri,“ segir Eiríkur Dagbjartsson útgerðarstjóri, sem hefur umsjón með viðburðinum. Hugh Lipscombe, eigandi veitingahúsakeðjunnar bresku, kemur jafnan til landsins í tengslum við hinn fjöruga föstudag í Grindavík – þá jafnan með tvo til þrjá úr starfsmannahópi sínum – og sjá þeir um að matbúa fiskinn og frönsku kartöflurnar eftir kúnstarinnar reglum.

„Ég bað Lipscombe að kenna mér hvernig matbúa skyldi fisk í deigi og svo djúpsteikja. Það gekk ekkert, svo úr varð að Bretinn sagðist myndu bara koma hingað sjálfur með föruneyti sínu og sjá um eldamennskuna, eins og þeir hafa gert nú í mörg ár og finnst gaman,“ segir Eiríkur Dagbjartsson.