„Samfelld blíða allan túrinn“

Í morgun kom Bjarni Ólafsson AK til hafnar í Neskaupsstað með fyrsta kolmunnafarm þessa veturs og nam hann 1.800 tonnum, að því er segir á vef Síldarvinnslunnar. Er haft eftir Gísla Runólfsson skipsstjóra að fyrsti vetrarfarmurinn hafi verið á svipuðum tíma í fyrra.

„Við héldum til veiða 16. nóvember og til að byrja með fór mikill tími í að leita. Í fyrstu var aflinn tregur. Við vorum að draga í 20 tíma og fengum gjarnan innan við 200 tonn í holi og allt niður í 60 tonn. Síðan fór þetta að ganga betur og í lokaholinu fengum við 300 tonn eftir að hafa dregið í sjö og hálfan tíma. Þarna var veiðin að byrja af einhverju viti. Við fengum aflann norðaustur af Færeyjum og það var samfelld blíða allan túrinn. Þetta var eins og á besta sumardegi,“ segir Gísli.

Bjarni Ólafsson AK að veiðum. Ljósmynd/Helgi Freyr Ólason

• Blogga um frétt