Nýr Bárður SH til landsins

Fjölmenni var við Hafnarfjarðarhöfn í morgun þegar Bárður SH 81, nýr bátur í eigu Péturs Péturssonar útgerðarmanns og skipstjóra á Arnarstapa, kom til landsins. Þetta er stærsti vertíðarbátur landsins sem smíðaður er úr plasti, en hann er 26,9 metra langur, sjö metra breiður og með 2,5 m. djúpristu.

Báturinn var smíðaður af skipasmíðastöðinni Bredgaard Boats í Rødbyhavn í Danmörku. Aðalvélin í bátnum er frá MAN í Þýskalandi og er 900 hestöfl og  eldsneytisnotkunin er  195 g/kWh og uppfyllir allar þær ströngu kröfur um mengun sem gerðar eru í dag. Snurvoðaspil, netatrommla og stjórnbúnaður fyrir snuðvoðina er með því fullkomnasta sem þekkist, og verður öll stjórnun á voðinni tölvustýrð með snertiskjá. 

Pétur Pétursson skipstjóri segir heimsiglinguna frá Danmörku hafa gengið vel og reynslan af bátnum hingað til sé góð. Nú tekur við að setja ýmsan nýjan búnað í skipið, svo sem netaspil. Þau verk ættu að taka um tvær vikur og eftir það verður stefnt vestur í Ólafsvík, þaðan sem báturinn verður gerður út.

• Blogga um frétt