18 sagt upp á skipi Samherja

Öllum skipverjum á línuveiðiskipi Samherja, Önnu EA 305, hefur verið sagt upp. Áhöfninni var tilkynnt um uppsagnirnar þegar skipið kom til hafnar á Akureyri í gær, er haft eftir Smára Rúnari Hjálmtýssyni skipstjóra á vef Vísis sem fjallaði fyrst um málið.

Smári Rúnar segir þörf á að gera umtalsverðar lagfæringar á skipinu og getur kostnaður numið tugum milljóna króna. „Það þarf að gera stórar lagfæringar á skipinu, laga stöðugleikann og svo liggur fyrir vélarúttekt. Þannig að það eru stórir póstar fram undan í viðhaldi og lagfæringum.“

Anna EA 305 var smíðuð árið 2001 af Umeo Sterkoder og er gerð út af Útgerðarfélagi Akureyringa. Þá er skipið með 416 tonna aflamark í þorski og 1.221 tonns aflamark í grálúðu, en Anna kom til hafnar með 4,5 tonn af grálúðu í gær.

Hvorki náðist í Önnu Maríu Kristinsdóttur, starfsmannastjóra Samherja, né Kritstján Vilhelmsson, framkvæmdastjóra útgerðarsviðs fyrirtækisins, við vinnslu fréttarinnar.

• Blogga um frétt