Birta endanlega dagskrá hluthafafundar Brims

Endanleg dagskrá hluthafafundar Brims, sem fer fram 12. desember, hefur verið birt á heimasíðu félagsins. Á dagskrá eru aðeins þrír liðir: Tillaga um kaup á öllu hlutafé í Fiskvinnslunni Kambi hf. og Grábrók ehf., tillaga Útgerðarfélags Reykjavíkur hf. (ÚR) um að leita leiða til að auka erlendar fjárfestingar í fyrirtækinu og að lokum önnur mál.

Brim gerði samning um kaup á öllu hlutafé í Kambi og Grábrók í október og var kaupverðið þrír milljarðar króna sem samsvarar skráðum verðmætum aflaheimilda félaganna tveggja. En eins og kom fram í umfjöllun ViðskiptaMoggans á miðvikudag hafa félögin verið rekin með tapi.

Frétt af mbl.is

Brim kaupir útgerð og vinnslu fyrir 3 milljarða

Taprekstur

Í árshlutareikningi Kambs fyrir fyrstu níu mánuði ársins kemur fram að rekstarniðurstaða félagsins var neikvæð um 4,5 milljónir króna, en hún var neikvæð um 37,6 milljónir árið 2018. Þá var dótturfélag Kambs, Grunnur ehf., einnig rekið með tapi og nam það 171,5 milljónum á fyrstu níu mánuðum 2019 og 163,5 milljónum árið 2018.

Fyrstu níu mánuði 2019 var rekstrarniðurstaða Grábrókar ehf. neikvæð um 19,4 milljónir, en hún var neikvæð um 89,5 milljónir árið 2018.

Frétt af mbl.is

ÚR vill erlendar fjárfestingar í Brimi

ÚR leggur til að hluthafafundurinn feli stjórn að leita leiða til þess að auka áhuga erlendra fjárfesta á Brimi. Meðal annars er stungið upp á því að Brimi verði breytt í eignarhaldsfélag og útgerðarstarfsemi þess verði flutt í dótturfélag. Þá verði stofnað nýtt félag sem skráð er í erlenda kauphöll og mun það fara með allt að 25% hlutafé í nýju eignarhaldsfélagi.

• Blogga um frétt