Togarar í var

Togarar sem verið hafa á vesturmiðum síðustu sólarhringa eru nú komnir flestir í var, nokkrir sunnan við Snæfellsjökul. „Við fundum glufu og verðum hér næsta sólarhring,“ segir Bergþór Gunnlaugsson skipstjóri á Tómasi Þorvaldssyni GK í samtali við mbl.is nú um hádegisbil. 

Á sömu slóðum og Tómas Þorvaldsson GK undir Jökli eru togararnir Akurey og Arnar HU. „Við vorum út af Vestfjörðum og komum hingað í nótt. Á leiðinni að vestan settum við út troll og náðum þá tuttugu tonnum á Flugbrautinni eins og miðin hér suðvestur af Snæfellsnesi eru oft kölluð,“ segir Bergþór skipstjóri.

Vindur er af norðri á Faxaflóa sunnan við Snæfellsnes og slær í allt að 20 m/sek. „Þetta á eftir að versna svo við höldum bara kyrru fyrir hér,“ segir Bergþór.

Þekkkt er að skip fari í var við Grænuhlíð, yst í Ísafjarðardjúpi, þegar stormar skella á. Þar eru nú línubáturinn Kristrún RE og togararnir Sólberg ÓF, Gnúpur GK og Baldvin Njálsson GK. Innar í Djúpinu er varðskipið Þór til taks ef aðstoðar er þörf í því ofsaveðri sem nú er spáð.

Bergþór Gunnlaugsson skipstjóri á Tómasi Þorvaldssyni. mbl.is

Varðskipið Þór er til taks í Ísafjarðardjúpi komi neyðarkall í óveðrinu. mbl.is/Sigurður Bogi

• Blogga um frétt