Forðuðu sér undan sprengilægðinni

„Við erum komnir aftur norður á Hala. Óveðrið olli því að við hrökkluðumst af Vestfjarðamiðum. Það var ákveðið að taka millilöndun í Reykjavík og bíða af sér veðrið en fara svo aftur út þegar það gengi niður,“ segir Árni Gunnólfsson, skipstjóri á frystitogaranum Vigra RE.

Árni og hans menn urðu líkt og allir að forða sér undan áhrifum sprengilægðarinnar sem gekk yfir landið og olli stórtjóni á þriðjudag og miðvikudag, segir á vef Brims.

Árni segist hafa verið á Halamiðum þegar einsýnt varð að ekkert venjulegt óveður var í vændum. „Það voru komnir 32 metrar á sekúndu þegar við hífðum og þar sem aflinn hafði verið góður var ákveðið að fara í millilöndun í stað þess að leita vars og bíða af sér veðrið,“ segir Árni en það höfðu skipverjar á Vigra þó reyndar gert einu sinni í túrum en þá var skipið í vari undir Grænuhlíð í Ísafjarðardjúpi í um sólarhring.

„Aflinn var annars mjög góður og það er fiskur að skila sér inn á öll veiðisvæðin. Þorskurinn er kominn aftur og við fengum góða þorskveiði á svæðinu austan við Strandagrunn og vestur á Halann. Við vorum með um 330 tonna afla upp úr sjó eftir átta sólarhringa og þar af fór einn í að liggja í vari,“ er enn fremur haft eftir Árna á vef Brims.

Að sögn Árna er enn slæmt sjólag á miðunum en hann segir að veðrið sé að ganga niður. Spáin er góð, a.m.k. fram á sunnudag. Stefnt er að því að vera aftur í Reykjavík 22. desember.

• Blogga um frétt