Mesti afli sem landað hefur verið á einu ári

Skip Bergs-Hugins hafa aflað 10.300 tonna að verðmæti 2,76 milljarðar króna á þessu ári. Er þetta mesti afli sem skip félagsins hafa komið með að landi á almanaksári og einnig mesta aflaverðmæti, að því er fram kemur á vef Síldarvinnslunnar. Þar segir að aflinn aukist um 150 tonn milli ára og verðmætið um 350 milljónir.

Í júlí fékk Bergur-Huginn afhent nýtt skip sem fékk nafnið Vestmannaey og í kjölfar þess fékk gamla Vestmannaey nafnið Smáey. Bergey var seld til Grundarfjarðar í haust og fluttist þá áhöfn hennar yfir á Smáey. Ný Bergey var síðan afhent félaginu 1. október og mun hún hefja veiðar eftir áramót.

Á þessu ári hefur Bergey veitt 4.414 tonn að verðmæti 1,14 milljarðar, Smáey (áður Vestmannaey) veiddi 5.232 tonn að verðmæti 1,42 milljarðar og nýja Vestmannaey náði í 655 tonn að verðmæti 200 milljónir króna. Það var síðan Smáey sem fékk mesta afla sem eitt skip Bergs-Hugins hefur fengið á almanaksári en í fyrra aflaði Bergey 5.230 tonna.

„Vestmannaey landaði fullfermi í Vestmannaeyjum í gær og Smáey er að landa í dag. Áhafnir skipanna munu nú fá jólafrí eftir afar gott ár,“ segir á vef Síldarvinnslunnar.

• Blogga um frétt