Vill halda ísverksmiðju í heimabyggð

Fiskmarkaður Snæfellsbæjar gekk nýverið frá samningi um kaup á ísverksmiðjunni í Ólafsvík af HG Geisla sem var rekinn af Hjörleifi Guðmundssyni.

Andri Steinn Benediktsson, framkvæmdastjóri Fiskmarkaðs Snæfellsbæjar, segir í samtali við 200 mílur nauðsynlegt að ísverksmiðja sé rekin í Snæfellbæ. Sú hætta hafi verið til staðar að vélarnar yrðu keyptar úr bæjarfélaginu og húsnæðið fengi annan tilgang. Fiskmarkaður Snæfellsbæjar hafi haft svigrúm til fjárfestinga og var því tekin ákvörðun um að festa kaup á verksmiðjunni til þess að tryggja áfram rekstur í heimabyggð og ekki síst sjá til þess að viðskiptavinir þeirra fái ís eftir þörfum.

Framleiðslugeta ísverksmiðjunnar er um 50 tonn á sólarhring en með í kaupunum fylgdi önnur ísvél sem hægt sé að setja upp og auka þar með framleiðsluna í um 75 tonn á sólarhring, að sögn Andra Steins sem segir jafnframt ís einn lykilþátta í sjávarútvegi.

„Við munum sennilega þurfa að bæta við manni eftir þessi viðskipti og er það í skoðun. Hjörleifur mun verða okkur innan handa til þess að byrja með,“ segir Andri Steinn og bætir við að hann þakki Hjörleifi fyrir góða þjónustu og þjónustulund síðustu ár.

• Blogga um frétt