Bíða af sér veðrið á Húnaflóa og í Djúpinu

Fjöldi skipa og báta er nú í vari í Ísafjarðardjúpi, þaðan sem þau komu af Halamiðum, vegna veðursins sem nú gengur yfir. Þá hafa einnig einhver skip farið í var á Húnaflóa af sömu ástæðu.

Eitt þeirra er grænlenska flutningaskipið Nuka Arctica, en það er í reglubundnum fraktflutningum milli Evrópu og Grænlands með viðkomu á Íslandi. Alla jafna kemur skipið suðurleiðina meðfram Íslandi til Reykjavíkur, en í nótt sigldi skipið norður fyrir landið til að vera í vari fyrir veðri og fór svo inn á Húnaflóa þar sem það hefur hringsólað síðan. Staðfesti vaktstöð siglinga að skipið hefði ætlað að bíða veðrið af sér þar áður en haldið yrði áfram til Grænlands.

Goðafoss, flutningaskip Eimskipafélagsins, sigldi á svipuðum tíma og Nuka Arctica frá Evrópu til Íslands og fór það einnig norðurleiðina. Er það nú komið til Reykjavíkur.

Nuka Arctica hefur hringsólað á Húnaflóa frá í nótt. Kort/Marine traffic

• Blogga um frétt