Bergey kemur til heimahafnar í fyrsta sinn

Skömmu fyrir hádegi í dag kom hin nýja Bergey VE til hafnar í Vestmannaeyjum í fyrsta sinn og var vel fagnað. Bergey var afhent Bergi-Hugin, dótturfyrirtæki Síldarvinnslunnar, 1. október sl. og kom til Akureyrar 6. október. Á Akureyri annaðist Slippurinn frágang á millidekki skipsins.

Þetta kemur fram á vef Síldarvinnslunnar. 
 
Bergey var smíðuð í skipasmíðastöð Vard í Aukra í Noregi og er eitt af sjö systurskipum sem skipasmíðastöðin smíðaði fyrir íslensk fyrirtæki. Eitt þessara skipa er Vestmannaey VE sem kom nýtt til landsins í júlímánuði sl. Skipin eru hin glæsilegustu og afar vel búin, en um er að ræða togskip sem eru 28,9 m að lengd og 12 m að breidd. Stærð þeirra er 611 brúttótonn. Eru skipin búin tveimur aðalvélum og tveimur skrúfum, að því er félagið greinir frá.
 

Létt var yfir áhöfninni á Bergey í morgun. mbl.is/Óskar Pétur

Skipstjóranum var fagnað með blómum í morgun. Frá vinstri Njáll Ragnarsson, formaður bæjarráðs, Jón Valgeirsson skipstjóri og Arnar Richardsson, framkvæmdarstjóri Bergs/Hugins ehf. mbl.is/Óskar Pétur

• Blogga um frétt