„Menn hafa gefist upp á þessu í bili“

Lítið hefur verið hægt að veiða kolmunna í færeyskri lögsögu vegna veðurs, jafnframt hafa veiðar gengið illa þegar veður leyfði. Þetta er meðal þess sem haft er eftir Sturla Þórðarson, skipstjóra á Beiti NK, á vef Síldarvinnslunnar.

Beitir og Börkur NK komu til landsins í gærkvöldi eftir að hafa verið að veiðum við Færeyjar í tvær vikur. Þegar komið var til hafnar var Beitir með 280 tonn af kolmunna og Börkur með 350 tonn.

Frétt af mbl.is

„Það er enginn friður til að athafna sig“

„Það var óveður nánast allan tímann og skipin hafa mest legið í höfn eða í vari. Við höfum legið mest í Þórshöfn og Runavík en lönduðum einu sinni í Fuglafirði. Fiskurinn er að ganga suður eftir og við sáum ekki mikinn fisk þann stutta tíma sem við gátum verið að. Nú eru held ég öll íslensku kolmunnaskipin komin heim nema Hoffellið. Menn hafa gefist upp á þessu í bili. Ég á varla von á einhverjum góðum loðnufréttum en ég á von á að haldið verði á kolmunnaveiðar vestur af Írlandi þegar komið verður vel fram í febrúar,“ segir Sturla.

• Blogga um frétt