Útbreiðsla kórónaveirunnar sem kennd er við borgina Wuhan í Kína er þegar farin að hafa áhrif á innflutning sjávarafurða og hafa framleiðendur eldislax í Síle og Noregi í auknum mæli beint viðskiptum sínum til Brasilíu og Bandaríkjanna í kjölfar þess að kínverskir kaupendur hafa afpantað sendingar, að því er fram kemur í umfjöllun Undercurrent News (UN).
„Það voru nokkrar afpantanir í síðustu viku. Hluti fiskins var þegar á leiðinni og annar á síleskum flugvöllum,“ hefur UN eftir Eduardo Goycoolea, sölustjóri New World Currents sem er sölusamlag nokkurra laxeldisfyrirtækja í Síle.
Heimildir UN herma að áhrifin séu lítil að svo stöddu en muni fara vaxandi ef ástandið heldur áfram að versna. „Ferskvörumarkaðir eru lokaðir um allt Kína, sumir viðskiptavinir taka sénsinn og kaupa, en flestir hafa afpantað,“ segir forstöðumaður alþjóðlegs laxeldisfélags sem ekki er nafngreindur.
Úrbreiðsla kórónuveirunnar gæti haft veruleg áhrif á viðskipti með sjávarafurðir.
AFP
Samtök skoskra laxeldisstöðva (SSPO) telja kórónaveiruna hafa haft áhrif á útflutning á skoskum eldislaxi til Kína. „Fyrstu vísbendingar benda til þess að eftirspurn eftir innfluttum laxi hafi dregist saman vegna stöðu heilsufarsmála í landinu, sérstaklega á sviði veitingahúsa og hótela.“
Þá er talið að kórónaveiran valdi því að fiskvinnslur í Kína muni ekki hefja rekstur á ný eftir kínverska nýárið hinn 3. febrúar ef útbreiðsla veirunnar heldur áfram. Kínverskar fiskvinnslur hafa unnið fisk fyrir erlenda markaði um langt skeið og gæti það haft áhrif á útflutning Kína.
Fleiri afurðir undir
Þá herma heimildir UN úr rækjuiðnaðinum að greinin hafi miklar áhyggjur af því að það taki of langan tíma að ná stjórn á ástandinu þar sem sala til veitingahúsa og hótela mun minnka umtalsvert, en Kína flytur inn um 624 þúsund tonn af rækju á hverju ári.
Útflutningur humars frá Nýja-Sjálandi til Kína hefur stöðvast og hafa nýsjálensk fyrirtæki leitað fjárhagsaðstoðar hjá þarlendum yfirvöldum. Greinin veltir um 320 milljónum nýsjálenskra dala, jafnvirði 25 milljarða íslenskra króna. Sambærilegt ástand er í Ástralíu og hefur meðal annars verið stungið upp á því að stöðva veiðar á núverandi fiskveiðiári og auka í stað kvóta á næsta ári sem nemur ónýttum veiðiheimildum.