Ísfiskur hf. tekið til gjaldþrotaskipta

Stjórn Ísfisks hf. hefur óskað eftir að félagið verði tekið til gjaldþrotaskipta eftir 39 ára samfellda starfsemi. Skessuhorn greinir frá.

Ísfiskur var framleiðslufyrirtækin án þess að vera með útgerð eða kvóta og var lengst af til húsa í Kársnesinu í Kópavogi, en starfsemin var flutt á Akranes árið 2018. Um fimmtíu manns störfuðu hjá félaginu þegar mest var og gjaldþrotið því áfall fyrir atvinnulíf í bæjarfélaginu.

„Stjórn Ísfisks er svekkt yfir þessum málalokum og harmar þau í ljósi stöðu atvinnulífs og þess umhverfis rekstrar sem stjórnvöld hafs sett okkur í um áratuga skeið. Reynt var í nokkra mánuði að loka fjármögnun á félaginu en út af stóð að það gekk ekki að fjármagna fasteignina sem starfsemin flutti í fyrir nokkru. Leitað var til nokkurra aðila með það, en án árangurs,“ segir í tilkynningu frá stjórn.

• Blogga um frétt