Arnarlax hefur aukið afköst sláturhúss síns á Bíldudal, fengið öflugt sláturskip til landsins og loðnuskip til að dæla upp dauðum laxi til að bregðast við erfiðleikum sem skapast hafa í eldiskví í Arnarfirði. Stjórnendur Arnarlax og dýralæknir fisksjúkdóma telja að fyrirtækið hafi með aðgerðum sínum náð tökum á ástandinu.

Umtalsverð afföll urðu á laxi í einni sjókví Arnarlax af fimm á staðsetningu sem kennd er við Hringsdal í Arnarfirði. Vandamálið á sér nokkurn aðdraganda. Fyrirtækið var að ala þar fisk í um 6 kg stærð sem gott verð fæst fyrir í Kína. Miklar frátafir urðu í slátrun í desember og janúar vegna óveðurs og á sama tíma lokaðist Kínamarkaður vegna kórónuveirunnar COVID-19.

Þegar stormar ganga yfir getur orðið mikil hreyfing í kvíunum og fiskurinn leitar niður þegar sjávarhitinn lækkar. Gísli Jónsson, dýralæknir fisksjúkdóma, segir að lax eigi til að bunka sig saman og þrýstast út í nótina við þessar aðstæður. Lítið þurfi til að sár myndist og bakteríur úr umhverfinu setjist í þau. Það geti valdið dauða laxins eftir ákveðinn tíma. Það hafi gerst í einni kvínni í Hringsdal. Áætlar Gísli að um 100 tonn af laxi hafi drepist en það er aðeins hluti af laxinum sem var í vandamálakvínni.

Tekið er fram í tilkynningu frá Arnarlaxi að ástand fisks á öðrum staðsetningum, það er í Tjaldanesi, Laugardal og Þúfnaeyri, sé með miklum ágætum.

Tengdar fréttir

Fiskeldi

„Margt hefur nú ekki beinlínis verið til fyrirmyndar“

• Segir nýtt frumvarp gefa eldisfyrirtækjum auðlindir
• Laxey fær sex milljarða
• Fjárfestingin 115 milljarðar króna
• Bátur Arnarlax verður fyrsti sinnar tegundar

» Fleiri tengdar fréttir