„Það fer vel um okkur, en það er haugasjór“

„Það fer vel um okkur, en það er haugasjór,“ segir Sindri Kristjánsson, stýrimaður á Jóhönnu Gísladóttur GK-557, í samtali við 200 mílur. Skipið hefur verið í vari utan Sandgerðis á Reykjanesi um tíma og segir Sindri það fari betur um áhöfnina en vonað var. „Það er búið að vera gríðarlegt rok.“

Hann segir ölduhæðina ekki mikla þar sem vindurinn hafi verið svo kraftmikill að hún næst ekki upp. „En það er stutt á milli og ber þokkalega á því.“

Jóhanna Gísladóttir GK-557 er meðal stærstu línubáta landsins. mbl.is/Ólafur Kolbeinn Guðmundsson

Jóhanna Gísladóttir er í viku túr og var lagt frá bryggju á mánudag og gerir Sindri ráð fyrir að hefja veiðar á ný um miðnætti í kvöld.

Þetta er þó ekki eina skipið utan Sandgerðis og eru þar einnig Sóley Sigurjóns GK-200, Palína Þórunn GK-049 og Arnar HU-001.

Ljósmynd/Sindri Kristjánsson

Það er fallegt á sjónum þótt blási Ljósmynd/Sindri Kristjánsson

• Blogga um frétt