Aldrei svo mörg skip í loðnuleiðangri
Ágúst Ingi Jónsson
Setja bókamerki
Fyrirhugað er að mæling á loðnu á næstunni nái yfir allt það svæði sem ætla má að fullorðin loðna geti fundist á á þessum árstíma. Gera má ráð fyrir að sú mæling taki allt að tíu daga. Kristján Þór Júlíusson, sjávarútvegs- og landbúnaðarráðherra, gerði grein fyrir stöðu loðnuleitar á ríkisstjórnarfundi í gær.
Rannsóknaskipið Árni Friðriksson heldur áfram leit út af Austfjörðum og um eða eftir helgi munu fimm skip frá útgerðum uppsjávarskipa einnig koma inn í leitina. Aldrei áður hafa svo mörg skip tekið þátt í loðnuleit, segir í frétt frá sjávarútvegsráðuneytinu.
Nýafstaðinn könnunarleiðangar á vegum Hafrannsóknastofnunar sýnir betra ástand stofnsins en fyrri mælingar bentu til, en gefur þó að mati Hafrannsóknastofnunar ekki tilefni til að leggja til útgáfu kvóta.
„Ljóst er að ástand loðnustofnsins hefur verið slæmt um nokkurt skeið og útlitið er ekki gott með tilliti til veiða í vetur. Þó er ekki rétt að afskrifa mögulegar veiðar meðan leit er enn í gangi. Varðandi útlitið á næstu vertíð þá er það mun bjartara. Í ljósi mælinga á ungloðnu síðastliðið haust hefur Alþjóðahafrannsóknaráðið lagt til veiðar á tæplega 170 þúsund tonnum af loðnu á vertíðinni 2020/2021. Sú ráðgjöf verður endurskoðuð að loknum mælingum í september 2020,“ segir á vef stjórnarráðsins.
„Það þarf að vinna mikinn fjölda upp“
Skar höfuðleðrið af íslenskri konu
Veiting hvalveiðileyfis ekki brot á EES-samningi
„Á réttri leið en nokkuð í land ennþá“
„Hvílir mikil leynd yfir þessu öllu“
Skemmtiferðaskip hætt komið nærri Viðey
Skiptir miklu meira máli en fólk grunar