Hafa sent sjö tonn af plasti í endurvinnslu
Setja bókamerki
Á síðasta ári féllu til um 43 tonn af plasti hjá Brimi. Þar af var 19 tonnum af meðal annars einnota fatnaði, lituðum plastumbúðum og mjölpokum fargað þar sem enginn endurvinnslufarvegur var til fyrir það, segir í svari Torfa Þorsteinssonar, forstöðumanns samfélagstengsla hjá Brimi, við fyrirspurn blaðamanns um umfang nýgerðs samnings fyrirtækisins við Pure North Recycling í Hveragerði um endurvinnslu á plasti.
Hann segir því um mikinn ávinning að ræða og að með samstarfinu við Pure North „opnast möguleiki á að endurvinna þetta plast á vistvænan hátt, sem annars hefði farið í urðun. Megnið af þessum 19 tonnum mun fara í endurvinnslu í framtíðinni. Það verður því nánast allt plast sem fellur til hjá Brimi endurunnið.“
Félagið er þegar farið að senda fyrstu gámana til endurvinnslu hjá Pure North Recycling og var fyrsti gámurinn með 4,5 tonn af hörðu plasti og annar gámurinn með 2,5 tonn af einnota plastfatnaði úr vinnslunni ásamt öðrum plastumbúðum, að sögn Torfa.
„Brim lítur á úrgang sem flokkaður er til endurvinnslu sem hráefni í aðra vinnslu,“ segir Torfi og bendir á að tekist hafi að auka það magn úrgangs sem fer í endurvinnslu á undanförnum árum. Árið 2016 var hlutfallið sem fór í endurvinnslu 56% en hlutfallið var 76% árið 2019.
Öflug skráning
Ljóst er að sorpflokkun fyrirtækja er að tæknivæðast og er það ekki síður tilfellið hjá Brim þar sem notaðir eru snjallgámar. „Allur úrgangur, sem fer í hann, er skráður á þá deild þar sem hann á uppruna sinn. Gámurinn er með vog sem skilar upplýsingum um magn úrgangs. Allt endurvinnsluhráefni er flokkað eftir skilgreindu flokkunarkerfi. Hver endurvinnsluflokkur er vigtaður með „snjallvog“ og merktur með úrvinnsluleið,“ útskýrir Torfi.
Upplýsingarnar úr kerfinu fara í gagnagrunn og hefur verið komið fyrir skjáum sem gera starfsmönnum kleift að fylgjast með flokkuninni.
Segjast hafa skotið niður langdræga sprengjuvél
Sárt að horfa upp á illa meðferð fjármuna
Ofsóttur innan veggja Boeing
„Menn eru bara búnir að forgangsraða“
Færa slökkviliðið til nútímans
Þrjú og hálft ár fyrir skotárás í Úlfarsárdal
Ekki byggt í takt við áform sveitarfélaga