Vilja samtal um sjávarútveg

Samtök fyrirtækja í sjávarútvegi (SFS) hafa ákveðið að halda fundaröð sem ber heitið: „Samtal um sjávarútveg.“ Er markmiðið að „leiða saman fólk úr ólíkum áttum til þess að ræða málefni sjávarútvegsins á breiðum grunni,“ að því er fram kemur í fréttatilkynningu frá SFS. Þá stendur til að kynna niðurstöður samtalanna á ársfundi samtakanna í maí.

„Íslenskur sjávarútvegur stendur frammi fyrir mörgum áskorunum og við viljum eiga opið samtal um hvernig best sé að takast á við þær. Samtal um sjávarútveg snýst um að ræða með uppbyggilegum hætti gagnsæi, umhverfismál, samfélagslegan ábata og nýsköpun og við viljum heyra sjónarmið sem flestra“, segir Heiðrún Lind Marteinsdóttir, framkvæmdastjóri SFS, í tilkynningunni.

Fyrsti fundurinn í fundaröðinni verður haldinn 26. febrúar í húsi Sjóminjasafnsins og verða frummælendur Þórður Snær Júlíusson, ritstjóri Kjarnans, Birna Einarsdóttir, bankastjóri Íslandbanka, Valmundur Valmundsson, formaður Sjómannasambands Íslands og Gunnþór Ingvason, framkvæmdastjóri Síldarvinnslunnar í Neskaupstað.

• Blogga um frétt