Kafarar skoðuðu Blátind í Vestmannaeyjahöfn

Það var Gunnlaugur Erlendsson, kafari og eigandi Gelp ehf., sem skoðaði ástandið á Blátindi sem sökk í höfninni í Vestmanneyjum í óveðrinu á föstudag í síðustu viku. Í samtali við 200 mílur segir hann bátinn illa farinn og að stefnt sé að því að hefja vinnu við að koma honum af hafsbotni á þriðjudag.

Frétt af mbl.is

Bátur sökk við bryggjuna í Eyjum

„Þetta var skoðun þar sem við erum að fara að lyfta honum upp. Það er verið að undirbúa það. Það er verið að smíða skó undir kjölinn á honum og svo erum við að fá lyftibelgi, belgi sem við setjum utan á hann,“ útskýrir Gunnlaugur.

Stýrihús Blátinds Skjáskot

Þá þurfi að fá slíka belgi víðsvegar af landinu að sögn hans þar sem enginn einn aðili býr yfir nægilega mörgum slíkum sem veita mikinn lyftikraft. „Það er verið undirbúa þetta allt saman. Svo byrjum við á þessu vonandi á þriðjudag í næstu viku, að setja undir hann og lyfta honum upp, og verðum vonandi búnir að þessu fyrir aðra helgi,“ segir hann.

Spurður hvort það hafi verið kalt að kafa í höfninni í febrúarmánuði segir Gunnlaugur svo ekki vera, enda vanur kafari. „Nei, maður finnur lítið fyrir því. Þetta eru núna sex gráður.“

• Blogga um frétt